Կարգ՝ ՄԱՄՈՒԼ

«Ժողովուրդ» օրաթերթի տեղեկություններով՝ հայտնի գործարար Բարսեղ Բեգլարյանին՝ Ֆլեշի Բարսեղին, թալանել են հենց իր ընկերության աշխատակիցները։ Մասնավորապես «Ֆլեշ Մոտորս» ՍՊԸ կոմերցիոն բաժնի մենեջերներից Կոնստանտին Կոստանյանը 2014-2015թթ. ընթացքում ընկերությունից հափշտակել է 65.6 մլն դրամ կամ մոտ 135 հազար դոլար արժողությամբ տարբեր տեսակի ավտոպահեստամասեր։ Ավելին՝ այս ընկերության կոմերցիոն բաժնի մեծածախ վաճառքի մենեջերներից Միշա Վարդանյանն էլ 2014-2015թթ. ընթացքում հափշտակել է 46.8 միլիոն դրամի կամ մոտ 96 հազար դոլարի գույք և գումար։ Կատարվածի վերաբերյալ հարուցվել են քրեական գործեր, և՛ Կոստանյանը, և՛ Վարդանյանը ձերբակալված են։ Ինչպես տեղեկացավ «Ժողովուրդ» օրաթերթը, այս քրեական գործերով ավարտվել է նախաքննությունը, ու գործերն ուղարկվել են դատարան։

ԱՄՆ դեսպանա­տունը ապ­րիլի 2-ին կայանալիք խորհրդա­րանական ընտրություններից հետո հնարավոր է՝ անցանկալի անձանց ևս մեկ «սև ցուցակ» պատրաստի։ Ընդ որում՝ ցուցա­կում կարող են հայտնվել ոչ միայն ընտրությունների բնականոն ըն­թացքը խաթարող քրեական տարրերը, այլև ընտրություննե­րին մասնակից ռեյտինգային թեկ­նածուները, որոնց վերաբերյալ բազում ապացույցներ են շրջանառվում ընտրակաշառքի և տարբեր բռնությունների մասին։ Դրանց թվում են՝ Միհրան Պողոսյանը, Արման (Գալուստի) Սահակյանը, Առաքել Մովսիսյանը (Շմայս), Արկադի Համբարձումյանը (Դերժավայի Արկադը), Սամվել Ալեքսանյանը (Լֆիկ), Ռուբեն Հայրապետյանը (Նեմեց), ովքեր Մար­տի 1-ի իրադարձություններից հե­տո արդեն մեկ այլ սև ցուցակում են, և 2008 թվականից ի վեր չեն կարողանում այցելել այդ երկիր։ Չի բացառվում, որ այդպիսի ցուցակ պատրաստի նաև ԵՄ-ն։

«Ժամանակ»

Իշխող Հանրապետական կուսակցությունը հասկանալով, որ օր օրի ընտրություններում բացարձակ մեծամասնություն ապահովելն ավելի դժվար է դառնում՝ քննարկում է ընտրություններում մասնակիցների թվի հետ աճպարարություն անել։ Դիտարկվում է 100 հազարից մինչև կես միլիոն ավելացնել ընտրություններում մասնակիցների թիվը։

Այն լավատեսական բոլոր սպասումները, թե էլեկտրոնային քվեարկությունը նվազագույնի է հասցրել կեղծիքների հավանականությունը, առնվազն չի համապատասխանում իրականությանը։

Որոշվել է կեղծիքի մեքենան աշխատեցնել երկու ուղղությամբ՝ առաջիկայում մասսայաբար նույնականացման քարտեր են տպագրվելու նույն անձի լուսանկարով և այդ անձի տարիքին մոտ մի քանի բացակա քաղաքացիների անձնական տվյալներով։

Երկրորդ միջոցը մատնահետք ընդունող էլեկտրոնային սարքն է։ Պարզվում է, որ ձայնային ազդանշանը թույլ չի տալիս միևնույն ընտրատարածքում երկրորդ անգամ մատնահետք թողնել, սակայն հարակից տեղամասում կրկնաքվեարկության պարագայում այդ ազդանշանը չի գործում։ Այսինքն՝ համընդհանուր ցանց չկա և շատ հնարավոր է դիմել կրկնաքվեարկության, միայն թե տարբեր տեղամասերում։ Ավելին, պարզվում է, որ միևնույն տեղամասում նույն մարդու կրկնաքվեարկությունը կազմակերպելու համար անհրաժեշտ է պարզապես քվեարկության էլեկտրոնային սարքն անջատել ու միացնել, որից հետ քվեարկությունն անարգել կարող է տեղի ունենալ:

«Ժամանակ»

«ՎՏԲ Հայաստան բանկ»-ը հայտնվել է աղմկահարույց պատմության կիզակետում: «Ժողովուրդ» օրաթերթի տեղեկություններով՝ այս բանկի մասնաճյուղերից մեկի կառավարիչ Հակոբ Սաֆարյանը դեռ նախորդ տարի համակարգչային տեխնիկայի օգտագործմամբ բանկից 28 միլիոն դրամ է հափշտակել:

Նույն մասնաճյուղի աշխատակիցներից Լևոն Մհերյանն էլ փորձել է հափշտակել 5 միլիոն 355 հազար դրամ, սակայն իր կամքից անկախ հանգամանքներով չի կարողացել հանցագործությունն ավարտին հասցնել:

Նրանց նկատմամբ ՀՀ քննչական կոմիտեում քրեական գործ էր հարուցվել, որն արդեն ուղարկվել է Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան՝ քննության: Սաֆարյանի և Մհերյանի նկատմամբ խափանման միջոց է ընտրվել ստորագրությունը՝ չհեռանալու մասին:

Իսկ մինչ այդ նկատենք, որ սա առաջին դեպքը չէ, երբ բանկի կառավարիչը մեծ գումար է հափշտակում. նախկինում ևս նման դեպքեր են գրանցվել, ու մեղավորները հայտնաբերվել են:

«Ժողովուրդ»

«Փաստին» հասած տեղեկություններով՝ երեկ մրցապայքարը թեժ է եղել նաև Գեղարքունիքի մարզի Սևան քաղաքում: Սևանի կենտրոնում՝ եկեղեցու մոտ ծեծկռտուք է տեղի ունեցել ՀՀԿ–ից ռեյտինգայինով առաջադրված պատգամավոր Կարեն Բոթոյանի ու Սևանի հացի գործարանի տնօրեն, թեկնածու Աշոտ Ավետիսյանի կողմնակիցների միջև: Ականատեսները պատմում են, որ կողմերն իրար հայհոյել են, ծեծել, անգամ բանը հասել է իրար արյունլվիկ անելուն:

ՀՀԿ–ականներին բաժանել է դեպքի վայր հասած ոստիկանությունը, որն էլ, սակայն, ականատես բնակիչներին հորդորել է ձայն չհանել, մոռանալ միջադեպի մասին:

ՀՀԿ թեկնածու Կարեն Բոթոյանը երեկ ողջ օրն անհասանելի էր, իսկ Աշոտ Ավետիսյանը «Փաստին» վստահեցրեց, որ նման բան չի եղել ու չէր կարող լինել: «Նման բան չի եղել Սևանում: Եթե լիներ, ես տեղյակ կլինեի: Մենք Կարեն Բոթոյանի հետ նույն կուսակցությունից առաջադրված թեկնածուներ ենք, ո՞նց կարող է նման բան լինի»,– հայտարարեց Ավետիսյանը՝ հավելելով. «Նորմալ քարոզարշավ ա գնում, ամեն մեկն իր հնարավորության սահմաններում պայքարում է»:

Իսկ միջադեպի վկաները հաստատում են կատարվածը:

«Փաստ»

«Չորրորդ իշխանություն» թերթը գրում է. «ՉԻ» տեղեկություններով՝ նախօրեին միջադեպ է գրանցվել Արարատի մարզի Ազատավան գյուղում: «ՉԻ» աղբյուրների փոխանցմամբ՝ նախօրեին «Ծառուկյան» դաշինքի շտաբում ուշ երեկոյան հերթական կերուխումը ավարտվել է ծեռկռտուքով, մեկ անձ մարմնական վնասվածք է ստացել:

Փորձեցինք այս առնչությամբվ մեկնաբանություն ստանալ Ազատավան գյուղի ԲՀԿ-ական գյուղապետ Պետիկ Ղազարյանից: Վերջինս հերքեց ծեծկռտուքի փաստը: «Ոչ կռիվ ա եղել, ոչ հավաք, ոչ մի բան էլ չի եղել: Գյուղում լիքը ժողովուրդ կա, թող մեկը ասի, որ կռիվ ա եղել, կամ բարձր խոսակցություն են լսել»:

Վայոց Ձորի մարզպետ Հարություն Սարգսյանը, փոխմարզպետ Սամվել Թարվերդյանը, կրթության վարչության պետը, խախտելով օրենքը, աշխատանքային ժամին ՀՀԿ-ական թեկնածուի՝ Աշոտ Արսենյանի հետ մասնակցում են քարոզարշավին, կոչ անում ընտրել նրան:

Ընդդիմադիր թեկնածուներից մեկը սա տեսագրել է և ուղարկել ԵԽԽՎ ԺՀՄԻԳ-ին: Վայոց Ձորի մարզպետը «Հրապարակ»-ի հետ զրույցում պնդեց, որ ինքը և կրթության վարչության պետը քարոզարշավին մասնակցում են՝ գտնվելով արձակուրդում, իսկ փոխմարզպետը ոչ աշխատանքային ժամերին է մասնակցում:

Մեզ լուրեր էին հասել նաև, որ մարզում բոլոր ջանքերը գործի են դրել Արսենյանի օգտին, աշխատողներին՝ գործը կորցնելու սպառնալիքով, չաշխատողներին՝ 10 հազար դրամ «մաղարիչ» խոստանալով։ Դեռ հայտնի էլ չէ՝ Արսենյանը կգնա՞ խորհրդարան՝ առայժմ «փող է, որ ծախսում է»: Մեզ չհաջողվեց խոսել թեկնածուի հետ՝ նա չի պատասխանում զանգերին:

«Հրապարակ»

Երեկ ուշ գիշերին դաժան ծեծի է ենթարկվել Աջափնյակում, թիվ 2 ընտրատարածքում «Ծառուկյան» դաշինքի կողմից ռեյտինգային ընտրակարգով առաջադրված Վահան Կարապետյանը (Չերիի Վահանը)։

Նույն ընտրատարածքում ռեյտինգային ընտրակարգով առաջադրված Պետական գնումների գործակալության պետ Արման Սահակյանի գլխավորած բանդան՝ Ֆազի և Գարիկի գլխավորությամբ, Վահան Կարապետյանի հետ ծեծի են ենթարկել մի քանի հոգու ևս՝ ջարդելով նաև մի քանի ավտոմեքենա։

Վահան Կարապետյանն այս պահին գտնվում է «Արմենիա» բժշկական կենտրոնի վերակենդանացման բաժանմունքում։ Նրա մոտ թույլ չեն տալիս որևէ մեկին մուտք գործել։ Գագիկ Ծառուկյանն իր տղաներին հանձնարարել է՝ փնտրել և պատժել մեղավորներին ամենախիստ ձևով։ Վիճակը պայթյունավտանգ է:

«Ժամանակ»

«Ժողովուրդ»-ի տեղեկություններով՝ ՀՀ ոստիկանության Երևան քաղաքի վարչության Կենտրոնական բաժինը ընթացք է տվել մայրաքաղաքի տարբեր հատվածներում փակցված հայտարարություններին «Գնում եմ ձայներ 10 հազար դրամով»։

Օրերս Երևան քաղաքի Ամիրյան 2 հասցեից ոստիկանության կենտրոնական բաժին են բերման ենթարկվել երկու քաղաքացիներ։ Մեզ հայտնի դարձավ, որ ոստիկանները փողոցում քայլելիս նկատել են Ամիրյան 2 հասցեի հարևանությամբ առկա գովազդային վահանակի մոտ հավաքված մի շարք քաղաքացիների, որոնք քննարկել են փակցված հայտարարությունը։ Իրավապահները մոտեցել են և նկատել երկու անձանց, որոնք փակցնելիս են եղել հայտարարությանը՝ «Գնում եմ Ձայներ 10 հազար դրամով», 010 543-523 հեռախոսահամարով։

ArmLur-ը զանգահարել էր նշված հեռախոսահամարով՝ հասկանալու համար, թե ով է ձայներ գնող անձը, և պարզվել էր, որ նշված հեռախոսահամարը ՀՀ կենտրոնական ընտրական հանձնաժողովինն է։ «Ժողովուրդ»–ը տեղեկացավ որ ՀՀ ոստիկանության Երևան քաղաքի վարչության կենտրոնական բաժնի գնդապետ Ա. Հովհաննիսյանը գրություն է ուղարկել ԿԸՀ նախագահ Տիգրան Մուկուչյանին։ Գրությամբ ոստիկանության գնդապետ Հովհաննիսյանը Տիգրան Մուկուչյանից խնդրել է հայտնել, թե արդյոք վերոնշյալ հեռախոսահամարը պատկանում է Կենտրոնական ընտրական հանձնաժողովին։ Եվ եթե հեռախոսահամարը պատկանում է ԿԸՀ-ին, «խնդրում ենք հայտնել, թե հեռախոսահամարին նշված հայտարարության հետ կապված զանգեր եղե՞լ են, թե՞ ոչ»։ Թե ինչ պատասխան է տվել ԿԸՀ նախագահը, և ինչ զարգացում կլինի այս գործով ցույց կտա ժամանակը»։

ԱԱԾ-ի կողմից պետական դավաճանության կասկածանքով կալանքի տակ գտնվող պահեստազորի մայոր 38-ամյա Գարիկ Մարությանի գործը Արմավիրի մարզի ընդհանուր իրավասության դատարանը քննում է գաղտնի: Հիշեցնենք, որ Գարիկ Մարությանին մեղադրանք է առաջադրվել պետական դավաճանության համար:

Ըստ ԱԱԾ-ի երկար տարիներ զբաղեցնելով ՀՀ ՊՆ տարբեր զորամասերի հետախուզության պետի պաշտոն` նա համացանցային սոցիալական կայքերի միջոցով կապ է հաստատել Թուրքիայում գործող ադրբեջանական հատուկ ծառայությունների հետ եւ վարձատրության դիմաց նրանց փոխանցել ծառայության բերումով իրեն հայտնի դարձած, այդ թվում՛ պետական գաղտնիք պարունակող տվյալներ:

Կայքում առկա գովազդ (ներ)- ի և/կամ մամուլի տեսության համար «Կրիմինալ Էյ Էմ » ՍՊԸ-ն պատասխանատվություն չի կրում: Կայքում հրապարակված այլոց տեսակետ(ներ)-ը կարող են չհամընկնել criminal.am խմբագրության տեսակետ(ներ)-ի հետ:
«Կրիմինալ Էյ Էմ » ՍՊԸ (crimianl.am), © 2017:

Հեղինակային և հարակից բոլոր իրավունքները պահպանված են:

Հասցե` Հայաստան, ք.Երևան 0010
Փ.Բուզանդի 1/3 շենք, 2-րդ հարկ
Հեռ: +374 43 405353
Էլ. փոստ` info@criminal.am

Գովազդի համար զանգահարել +374 41 405353

© Copyright 2017 | All rights reserved. designed by Hakob Jaghatspanyan for Criminal.am LLC.